بغيتي البزيطيم ديما فيه الفلوس؟ ايوا دخلي هنا

سلام سحيحراتي اش خباركم، لاباس ؟

اليوم غنتكلم ليكم على الـ Feng shui الخاص بالبزطام، البنات اللي اول مرة كيسمعو هاد المصطلح فهو علم و فن صيني كيهتم بالتدفق ديال الطاقة و التأثير ديالها على حياتنا اليومية، غالبا كنسمعو عليه بزاف في مجال تأثيث و تزيين المنازل، صراحة انا ماشي اختصاصية في هاد المجال و لكن عندي تجربة متواضعة بغيت نشاركها معاكم
البزطام كيمتل علاقتك بالفلوس او الحضور ديالها في حياتك، مثلا الريال لي شدتيه كيطير و ديما ماماك مشادة معاك و تكولك واقيلا ايديك متقوبين.. هو في الصراحة الا قلبتي بزطامك غتلقيه نيت متقوب فهمتي الفكرة ؟

- بزطامك خاصو يكون ديما نقي، ماشي جامعة فيه زبل ديال مسكة فلاش و شي وريقات كاتبة فيهم نماري تيليفونات ولا كويغط ديال واحد البوماضا باغا تشريها، خويه من هادشي كامل لانو تيرون الطاقة، خلي فيه غير الفلوس او اي حاجة عنندها علاقة بالفلوس بحال لاكارت ديال الكيشي مثلا، ممنوع تحطي فيه توصيل ديال شي حاجة شريتيها او الورقة باش تقديتي من السوبرمارشي لانو هادو رمز لخسران الفلوس.. واش هادي هي الطاقة لي بغيتي تكون في بزطامك ؟

- بزطامك خاصو يكون في صحة جيدة   يعني مامقطع مامقشر ولا السنسلة ديالو خاسرة، الا كانت فيه شي حاجة من هادشي لي دكرت ضروري تشري بزطام جديد
- البزطام الجديد ما تشريه حتى يكون نيت عجبك ماشي تشريه غير باش تعدي، الالوان كتلعب دور مهم في مسألة الطاقة، الوان الفلوس معروفين الاخضر و الاحمر و الازرق بتالي هاد الالوان كتجيب الفلوس، ممكن تختاري الدهبي او الفضي حتى هوما مزيانين لحقاش كيفكرونا بالمعادن النفسية، الا ما كتعجبوكش هاد الالوان ماشي مشكل ختاري اللون لي تيعجبك بزاف لانو الاحساس ديالك هو المهم.
- ديما خلي في بزطامك شي حاجة ديال الفلوس، عمرك تخويه، لانو الا خليتي فيه شي حاجة، كل ما غادا تفكري بزطامك تلفائيا غتفكري انو مزال فيه الفلوس و غاديا تجذبي الفلوس ليك بلاما تحسي اما الا خويتي بزطامك غتبقاي تفكري بلي راه ماعندكش الفلوس و بالتالي فلعلا غتبقاي على الحديدة و ديما حازقة، من الاحسن تخلي فلوس وراق و على قد ما قيمتهم طالعة غتكون طاقتك اقوى.
- رتبي الفلوس في بزطامك من الرقم الصغير الى الرقم الكبير و خليهم مقادين، يعني الا كانت الحاشية مطوية سرحيها مزيان
- ديري لبزطامك واحد المسحة خفيفة من زيت بدور العنب، لانو العنب هو رمز الوفرة و الرفاهية و التروة عند بزاف الحضارات القديمة